Азнакай Әнәс Исхаков белән хушлашты

22 октябрь 2019 ел., сишәмбе

Мәрхәмәтсез үлем Азнакай муниципаль районының Мактаулы гражданины, элеккеге хакимият башлыгы Әнәс Гатуф улы Исхаковны арабыздан мәңгелеккә алып китте.
Әнәс Гатуф улы ТАССРның Лениногорск районы Югары Чыршылы авылында туган.
Үзенең хезмәт юлын ул 1965 елда Актүбә урта мәктәбендә рәсем һәм сызым укытучысы булып башлый. Шул дәвердән алып, 40 елы Азнакай районы белән бәйле. Ул комсомол, партия органнарында эшли, бик күп яңа башлангычларның инициаторы була.
1983-1992 елларда Азнакай район Советы башкарма комитеты рәисе итеп билгеләнә.
1992-2005 елларда Әнәс Гатуф улы Азнакай районы һәм шәһәре хакимиятен җитәкли, халык депутатларының берләштерелгән Советына рәислек итә.
1990-1995 елларда Татарстан Республикасы Югары Советына депутат итеп сайлана.
1995-2000 елларда Татарстан Республикасының халык депутаты, дәүләт төзелеше мәсьәләләре, җирле үзидарә һәм тышкы элемтәләр буенча комиссия әгъзасы була.
2005 елдан Әнәс Исхаков Татарстан Республикасы Министрлар Кабинетының дәүләт власте һәм җирле үзидарә башкарма органнарын оештыру һәм үзара эшчәнлек буенча бүлек начальнигы.
Әнәс Гатуф улы Исхаков Халыклар Дуслыгы Ордены, “Бөтенроссия халык санын алуны үткәрүдәге хезмәтләре өчен”, “Фидакарь хезмәт өчен” медальләренә ия, “Татарстан Республикасының Атказанган Авыл хуҗалыгы хезмәткәре” исемен ала.
Әнәс Гатуф улы район һәм шәһәрнең социаль-икътисади үсешенә зур өлеш керткән легендар шәхес. Аның җитәкчелегендә һәм турыдан-туры катнашында җирлегебездә юллар, торак йортлар салынды, социаль мәдәни объектлар калкып чыкты, халыкның тормыш-көнкүрешен яхшырту юнәлешендә максатчан эш алып барылды. Районның иҗтимагый тормышында да бик күп башлангычларның инициаторы булды. Төркиянең Тарсус шәһәре белән кардәшлек күперен салучы да ул булды.
2004 елның 2 июлендә халык депутатларының берләштерелгән Советы карары белән аңа “Азнакайның Почетлы гражданины” исеме бирелде.
Азнакайлыларның олы хөрмәтенә ия Әнәс Гатуф улы иҗади ялкынлы, талантлы шәхес иде. “Маяк” газетасы каршында районның “Гөлстан” әдәби берләшмәсе башында торып, аңа бу исемне бирүче дә шагыйрь Әнәс Гатуф улы булды. Аның шигырьләренә бик күп җырлар язылды, Азнакайга багышлап күңел түреннән чыккан шигьри тәлгәшләрендә туган якка мәхәббәтен, аның кешеләренә соклануын, хөрмәтен чагылдырды.
Әнәс Гатуф улы Исхаковның якты истәлеге күңелләрдә мәңге сакланыр.
М.З.Шәйдуллин, Н.М.Нәгыймов, А.Ф.Хәлиуллин, А.Х.Шәмсетдинов, М.И.Солтанов, Д.Р.Гыйләҗев, Г.Г.Сөләйманова, Р.Р.Ханнанов, М.В.Усманов, М.И.Кәримов

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования