Бәхет юлдаш булсын

 ЗАГС та шәһәрдә 500нче бала туу уңаеннан тантана узды.
12 октябрьдә 10.00 сәгатьтә дөньяга чираттагы нәни азнакайлы аваз сала.
Аның авырлыгы 3.300кг,  буе 55см тәшкил итә.
Әти-әнисе кызларына Амелия исемен куша, тәрҗемәдә ул тырыш дигәнне аңлата. Үзенең беренче көненнән үк балага бәхет елмая – ул Азнакайда 500нче булып дөньяга килгән сабый.
Резеда һәм Алексей Калининнар гаиләсендә Амелия 10 ел дәвамында көтеп алынган икенче бала.
Әлеге шатлыклы вакыйга белән ата-ананы Азнакай муниципаль районы башкарма комитеты җитәкчесенең социаль мәсьәләләр буенча урынбасары Дамир Гыйләҗев һәм мәгариф идарәсе начальнигы Гаяз Хәмидуллин котлады.
- Икенче бала ул икеләтә шатлык, беренчесе малай, икенчесе кыз булганда – бигрәк тә, - диде тәбрикләү сүзендә
Дамир Рашат улы һәм аларга яшь парлар паркында алмагач утыртырга тәкъдим итте. Әлеге фикерне барысы да хуплады, әнә шулай шәһәребездә яңа йолаларга да нигез салына.
Гүзәл ТИМБАКОВА