Өстәмә төркемнәр күп гаиләнең проблемасын хәл итте

2013 елның 6 декабре, җомга
Азнакайның 8 нче мәктәбе базасында 3 нче «Айсылу» балалар бакчасының өстәмә дүрт төркеме ачылды.

    Әлеге шатлыклы вакыйга белән әти-әниләрне, тәрбиячеләрне һәм сабыйларны котларга РФ Федераль Җыены Дәүләт Думасы депу­таты Марсель Галимәрданов килде.

   – Район кураторы буларак, Азнакайның уңышларын һәрдаим күзәтеп торам, – диде ул һәм ата-ана­ларныћ шатлыгын уртаклашты.

    Тантанада “Бердәм Россия” партиясе рәисе Дмитрий Медведевның ТРдагы региональ җәмәгатьчелек кабул итүе җитәкчесе, ТР Дәүләт Советы депутаты Василий Логинов һәм ТР Дәүләт Советы депутаты Рәзиф Галимов һәм башкалар катнашты. Бәйрәм кунакларын муниципаль район башлыгы Марсель Шәйдуллин сәламләде. Ул сыйфатлы итеп һәм ва­кытында төзекләндерү эшләрен баш­карып чыккан эшчеләргә рәхмәтен бел­дерде.

    Гомумбелем бирү мәктәбен капиталь төзекләндерү программасы кысала­рында 2 ай эчендә сафка бастырылган әлеге бина 4 төркемгә исәпләнгән. Алар икенче һәм өченче катларда урнашкан, беренче катта ризык хәзерләү блогы җиһазландырылган. Логопед бүлмәсе дә яңа бинага күчерелде. 20 гә якын азнакайлы эш урыны белән тәэмин ителде.

 – Балалар югары сыйфатлы тәрбия һәм белем алу учагына килә. Бакча­да сабыйлар өчен җан атып торучы тәрбиячеләр эшли, коллективны Ләйлә Хафизова җитәкли. Яңа төркемнәр әкияттәгедәй тиз булдырылды. Моның сәбәбе – районыбызда нәтиҗәле эшли торган җитәкчеләребез күбәю, – диде “Айсылу” бакчасына оныгын китергән ветеран-педагог Тәнзилә Хафизова.

    Символик кызыл тасма киселде, кунаклар бинага уздылар. Балалар бакчасының бүлмәләре бик иркен, һәр төркемдә чишенү, йокы, юыну бүлмәсе, буфет, туалет бар. Уен һәм уку бүлмәсе дә киң, якты. Заманча тәрәзәләр ку­елган, ремонт ясалган, өр-яңа җиһазлар кайтарылган.

    Бу тантанада иң бәхетлеләре ата-ана­лар һәм сабыйлар булгандыр, мөгаен.

– Урамда зур машина ясап куйган­нар. Руле дә әйләнә, кабинадан кузов­ка чыгып була, аңа тау беркетелгән. Күңелле итеп тау шуабыз, –диләр бер-берсен бүлдереп Ислам белән Азиз. Ишегалдына өр-яңа заманча уен мәйданчыклары куелган. Алар балаларның яшь үзенчәлекләрен истә тотып ясалган. Бирегә балаларын йөр­түче Әлфия Гыйләҗева:

– Улым Исмәгыйль һәм аның дусларының чыгышын горурлык хисе белән карадым. Кызым кечкенәләр төркеменә йөри. Яңа төркемнәр ачылгач өченче балам Йосыфка да урын бул­ды, – дип шатлыгын бүлеште. Өстәмә төркемнәр ачу күп кенә гаиләләрнең проблемасын хәл итте. Әлеге бакча Азнакай халкына озак еллар хезмәт ит­сен, балаларның шатлыклы тавышлары гөрләп торсын.

 

ОАО "Татмедиа" филиалы  "МАЯК" редакциясе  http://aznakaevo-rt.ru/ru.html

 
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Район турында
Документлар
Матбугат хезмәте
Дәүләт һәм муниципаль хезмәт күрсәтү
Телефон: (85592) 72483, (85592) 72471
Факс: (85592) 72031
Без социаль челтәрләрдә:
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International