Җинү җиңел бирелмәде

2013 елның 18 декабре, чәршәмбе
– Әй, балакаем, әйтсәм-әйтим, Ходай биргән гомеремдә минем күрмәгәнем калмады – тәмугында булырга да, оҗмах ләззәтләрен татырга да туры килде бугай инде, – дип башлады ул үзенең сүзен икәүдән-икәү генә әңгәмә корганда.

 ...Тормышының яшь­лек еллары, заман­дашларыныкы кебек үк, җиңелләрдән булмаган Вәлхия Әхмәтованың. Бала чагын, яшьлеген туган авылы Тайсуган­да уздыра – үз вакыты өчен шактый дәрәҗәле саналган җиде сыйныф белем ала, колхозда төрле эшләрдә катнаша. Бөек Ватан сугышының хәлиткеч борылыш чо­рында – 1943 елның язын­да, югарыдан бирелгән мәҗбүри разнарядка бу­енча, Әлмәт районының берничә авылыннан җыелган 18-21 яшьлек кыз-кыркын, шул исәптән Вәлхияне дә, Яшел Үзән шәһәрендәге фанер заводына эшкә алып китәләр. Юка гәүдәләре, нәзек беләкләре белән әзмәвердәй ир-атлар өчен дә җиңел бирелми торган эш башкаралар алар – җәен урманда агач кисәләр, аны ти­ешле стандартка ките­реп турыйлар, төяп оза­талар. Ә инде кышын үзләре хәзерләгән чи­малдан фанер өчен так­та теләләр.

– Эше безнең өчен үтә дә авыр булды. Ашатула­ры да ташка үлчим генә – тәүлегенә берничә йөз грамм кара ипи дә, коры суда пешерелгән кәбестә шулпасы. Әмма яшь­лек үзенекен иткәндер инде: шул үзебезгә дәҗитмәгән икмәкнең бер өлешен колхоз ба­зарында сата идек тә, ашауны кысып җыйган азмы-күпме акчага Соро­чи базарыннан беренче хаҗәттәге кием-салым, чүпрәк сатып ала идек, өскә дә кием кирәк бит, – дип искә ала Вәлхия Әхмәтова ул елларны.

    Эш авырлыгыннан да бигрәк, туган якла­рын сагыну үзәкләренә үтә кызларның. Түземлекләре тәмам төкәнгәч, өйдәгеләр белән күрешеп, кире килү теләге белән урман­да эшләгән җирләреннән бер көнне качарга ка­рар кылалар болар. Шу­лай итәләр дә. Берничә көннән кайда җәяү, кайда олаучы транспортта кай­ткан ачлы-туклы, хәлдән тайган җиде качак кыз Чистай пристанена килеп төшә. Тамак ялына көне буе баржадан йөк буша­талар. Бераз хәл алгач, юлларын Әлмәт ягына таба дәвам итәләр...

   Чыгып китүләренә нәкъ бер атна дигәндә, туган йортының ишеген ша­кый Вәлхия. Ә анда инде аны күз яшьләренә буы­лган әнисе һәм ... завод уполномоченные көтеп утыра... Кызларның ба­рысын да җыеп, кире урман кисәргә алып китәләр. Җиңү хәбәрен алар биредә тагын бер ел эшләгәннән соң, цех түрендә эленеп торган эшләпә репродуктордан ишетә...

   1946 елны Вәлхия фронтовик Шәмси Әхмәтовка кияүгә чыга. 55 ел бергә гомер итәләр, балаларын тәрбияләп үстерәләр. Олыгайгач, дүрт уллары да нефтьче булып эшләгән Актүбә бистәсенә – сугыш ве­теранына бирелгән фа­тирга, күченеп киләләр. Гаилә хуҗасы бүген юк инде.

...Үзенең озын-озак гомерендә бәхет җимешеннән бигрәк тор­мыш әчесен күбрәк таты­ган, шуңа да карамастан киң күңелле, шаян-җор телле, тормыш сөючән шәхес булып кала белгән тыл ветераны Вәлхия апа Әхмәтованы шушы көннәрдә Азнакай муни­ципаль район башкарма комитеты җитәкчесе Ай­дар Шәмсетдинов, соци­аль яклау бүлеге, Вәлхия апа егерме елга якын хезмәт куйган Азнакай по­чтамты җитәкчеләре 90 яше белән тәбрикләде, истәлек бүләкләре тап­шырды, алга таба да бәхетле гомер теләде.

– Ходайның биргән һәр көненә рәхмәт укып, ул-киленнәрем, онык-оныкчыкларым белән го­рурланып, хөрмәтләрен тоеп, бүгенге көн өчен сөенеп яшим, – ди «1941-1945 еллардагы Бөек Ватан сугышында фида­карь хезмәт өчен» ме­дале белән бүләкләнгән тыл ветераны Вәлхия апа Әхмәтова.

 

Наил Абдуллин        

 
ОАО "Татмедиа" филиалы  "МАЯК" редакциясе  http://aznakaevo-rt.ru/ru.html
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Район турында
Документлар
Матбугат хезмәте
Дәүләт һәм муниципаль хезмәт күрсәтү
Телефон: (85592) 72483, (85592) 72471
Факс: (85592) 72031
Без социаль челтәрләрдә:
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International