Азнакай муниципаль районы

Буралының "Ак әбисе"

2013 елның 26 декабре, пәнҗешәмбе

Иңнәренә ир-ат җегәрлеге салып, авылга беренче кайткан өч тракторның берсенә утырып иген үстерүгә алына Маһинур Афзалетдинова. Гомере әнә шулай туктаусыз хезмәттә, туган авылы басу-фермаларында үтә.

Җиһанның аклыгына күмелеп утырган Буралы авылында безне, күңелләренә дә аклык-пакълек салынган шушы төбәк уңганнарын җыйган йортта бик кунакчыл каршы алдылар. 95 яшьлек Маһинур апаны гомер бәйрәме белән котларга килүчеләрне ерып үтмәле түгел. Авыл биләмәсе башлыгы Нияз Фәтхетдиновтан башлап, авыл активистларын, халкыбызның борынгы милли киемнәреннән әллә каян балкып торган “Сердәшләр” ансамбле үзешчәннәрен әйтәсеңме, “Ак әбине” үз иткән авылдашларның олысы-кечесе, туган-тумача... читтән дә якыннары кайткан. Үзенә күрсәтелгән бүгенге хөрмәт, бигрәк тә район башкарма комитеты җитәкчесенең социаль мәсьәләләр буенча урынбасары Дамир Гыйләҗевнең район җитәкчелеге исеменнән җиткергән котлавын ишетү, РФ Президентының шәхси тәбрикләү хатын тапшыруы аның өчен әйтеп бетерә алмаслык тантана, олы сөенеч булды.

– Сезнең алда зур ихтирам белән баш иябез. Тылда, аннан соңгы авыр елларда, гомерегез буе куйган тырыш хезмәтегез өчен тирән рәхмәтләребезне җиткерәбез. Сез узган тормыш юлы киләчәк буыннар өчен мәгънәле, олы үрнәк ул. Сәламәтлек-сихәтлек белән менә шулай якыннарыгыз, авылдашларыгыз кадер-хөрмәтенә күмелеп яшәргә язсын сезгә Маһинур апа, – дип юбилярга изге теләкләрен ирештерде ул.

Аның бу котлауларын район социаль яклау идарәсе вәкиле Фәүзия Бакирова, авыл җитәкчеләре, авылдашлары дәвам итте. Китапханәче Вәсимә Фәхразова, “Сердәшләр” ансамбле тәбрикләүләрен җырлары аша юллады.

1937 елда Чалпыда тракторчылар әзерләү курсын тәмамлап, авылдашлары Хәмит һәм Бари Файзуллиннар, Латыйп Мортазин белән бергәләп корыч айгырны иярләргә алына Маһинур. Чая, тырыш уңган-булган кызны күршедәге Чубар Абдулның шофер егете Әхмәтшәрип тиз күреп ала һәм буралылар борынына чиртеп, озакка сузмый өйләнеп тә куя. Гаиләдә бер-бер артлы мәхәббәт җимешләре – Индус һәм Мәрьям туа. Мәңге шулай матур гына яшәрләр кебек тоелган өметләрне каһәрле сугыш җимерә. Әхмәтшәрипкә фронттан исән-имин әйләнеп кайту насыйп булмый. Бертуган ике абыйсының да “сугышта һәлак булды” хәбәре генә килә. Берсеннән-берсе кечкенә балалар белән Маһинур бу чорның бар авырлыгы алдында берүзе торып кала. Әле ярый янәшәдә әнисе бар. Кышкы кичләр аның белән солдатларга оекбаш-бияләй бәйләп үтә. Ә инде җир ачылуга кабат иген басуына чыгып китә.

– Сугыш чорында биш ел Митрофановкада эшләдек. Аягы аксак Николайның җәфалануларын күреп җаннар сыкрый иде, – дип сөйли Маһинур апа ара-тирә күз яшьләрен сөртеп. – Чубар Абдулныкы Мәүлит бригадир иде. Көне-төне басудан кайтып керми эшләп ничек чыдалгандыр, Ходай гына белә.

Сугыштан соң ул Буралыда озак еллар фермада маллар карый. Фидакарь хезмәтенең чагылышы булып хәзер әнә бер көлтә Мактау грамоталары, медальләре саклана.

Нинди генә чорларда да, баштан нинди генә кайгы-хәсрәтләр кичкәндә дә биш вакыт намазын калдырмаган Маһинур апаның телендә сүз саен Ходайны искә алу, ил-көнгә изге теләк-догалар. 96 яшенә кадәр әнисен карый, аңа кадер-хөрмәтен күрсәтә.

Хөкүмәтебезнең тыл ветераннарына, ирләре сугышта үлгән ятимә хатыннарга соңгы вакытта күрсәткән ярдәм-кайгыртуына да күңеле булган аның. 6 оныгы, 12 оныкчыгы һәм аларның 3 оныгы, аны сабый баладай караган кызы Мәрьямне (аларга яшәргә килүенә әле ике генә ел, моңарчы әниләре үз дөньясын үз нигезендә көткән) хәзерге тыныч тормышның рәхәтен, бәрәкәтен белеп, разыйлыкта яшәргә чакырып, алар өчен куанып бетә алмый. Намазлык алдына иелгән кечерәйгән какча гәүдәле “Ак әби”нең камил акылы, яхшы хәтеренә, әнә шулай үз сыенда матур олыгаюына күз тимәсен дип, сагаеп кына сокланып куясың...

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ