Азнакай муниципаль районы

Чыршы һәм Яңа ел

2013 елның 27 декабре, җомга

Халкыбызның яраткан, 12 ай буена көтеп алган бәйрәме – Яңа ел якынлаша. Аны купшы, төрледән-төрле уенчыклар белән бизәлгән яшел чыршысыз күз алдына китерүе дә кыен. Хәзер кайберәүләр инде чыршы артыннан чабып вакыт әрәм итми, ясалмасын сатып ала. Ә кибетләрдә аларның җаның теләгәне бар. Әмма күпчелек кеше өй түрләрен урманның хуш исен бөркеп торган табигый чыршы бизәвен хушрак күрә.

Безнең заманда аны сатып алуның бернинди дә кыенлыгы юк – бәйрәм алдыннан адым саен нарат-чыршы базарлары оештырыла. Бәяләре дә кыйммәт түгел – 200-300 сум гына.

– Әмма кайберәүләр урман күркен үз белдекләре белән кисә, – ди Азнакай урманчылыгы җитәкчесе Илназ Кашапов. – Ә моның өчен закон нигезендә административ җаваплылык – гади гражданнарга – 3 мең, юридик затларга 150 мең сумга кадәр штраф салу каралган. Моның өстенә агачның биеклегенә, ул үскән урманның максатчанлыгына карап, гаепле кешегә китерелгән зыянны да түләргә туры килә. Әгәр дә ул 5 мең сумнан артып китә икән, җинаять эше кузгатыла. Бу очракта гаеплегә карата җаваплылык та арта – штраф күләме 200 мең сумга җитәргә яки ул 360 сәгатькә мәҗбүри эшкә тартылырга, яки 1 елдан 6 елга кадәр ирегеннән мәхрүм ителергә мөмкин.

Дәүләт урман инспекторлары һәм полиция хезмәткәрләре Яңа ел алды көннәрендә ылыслы агачларны саклау буенча күзәтчелекне көчәйтә. Бәйрәмегезнең яме китмәсен дисәгез, чыршы-наратларны сату вәкаләтләре булган урыннардан гына алыгыз.

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ