Азнакай муниципаль районы

Үз радиобыз бар!

2013 елның 31 декабре, сишәмбе

Азнакай радиосы эшли башлау – узып баручы елның истәлекле һәм шатлыклы вакыйгаларыннан берсе. Инде без район хәбәрләрен газета, телевидение аша гына түгел, һәр көнне иртәсен, көндез, кичен – юлдамы, эштәме, өйдә кухня тирәсендә мәш килеп йөрибезме – радиоэфирдан тыңлау бәхетенә ирештек.

Районда булган барлык вакыйгаларны тәҗрибәле журналистлар Ләйсән Габдуллина һәм Гөлназ Бәдертдинова тавыш операторы Илнур Вәлиуллин ярдәмендә халыкка җиткереп торалар.

– Быел 18 мартта район башлыгы Марсель Шәйдуллин инициативасы белән җирле “Азнакай” радиотапшыруына нигез салынды. Бүгенге көндә егермегә якын тапшыру өстендә эшлибез. Предприятие, оешма, учреждение җитәкчеләре белән әңгәмәне үз эченә алган “Кунак йорты”, районның талантлы шәхесләре турында сөйләүче “Синең кешеләрең, Азнакай”, авыл яшәешен чагылдырган “Авыл офыклары” тапшыруын тыңлаучылар яратып кабул итте, – ди телерадиокомпаниянең радио буенча директор урынбасары Ләйсән Габдуллина.

Район халкын борчыган сораулар һәм аларга җитәкчеләрнең җавапларыннан төзелгән тапшырулар да эфирда даими рәвештә яңгырап тора.

Туган ягыбыз шагыйрьләре, композиторларының иҗат җимешләрен, сәхнә йолдызлары башкаруында җырларны яратып тыңлый халык. Үзләре дә иҗат дәрте белән янып яшәүче Ләйсән һәм Гөлназ безгә телеэкраннар аша бик күп җылы тапшыруларыннан яхшы таныш. Радиога кереп китүләре һич очраклы түгел.

– Алабугада педагогия институтында укыганда ук җирле радиода эшли идем. Биредә тәҗрибәле журналистлар кулы астында канат ныгыттым, хезмәтемә мәхәббәтем уянды. Гаилә корып, Азнакайга кайткач та, радио ачылыр дигән өмет белән янып яшәдем һәм менә хыялым тормышка ашты, – ди Ләйсән.

Тумышы белән Мөслим районы Торыш авылыннан ул. Балачактан шигырьләр иҗат итә, журналист булырга омтыла.

Гөлназ да кечкенәдән хис дөньясында яши. 4 нче мәктәпнең унберенче сыйныф укучысына, республика прокуратурасы үткәргән иншалар конкурсында беренчелекне яулап, ТИСБИга бушлай укырга керү юлламасы тапшыруларын әле дә хәтерлим. Мин аны кечкенә бөтерчеккә ошатам. Җитешмәгән бер җире, белмәгән бер һөнәре юк: аш-суга кулы ятып тора, бәйли, тегә, чигә, машинада йөри, ул үстерә, шигырьләр яза.

– Бик яхшы оештыручы. Эшен тиз һәм югары дәрәҗәдә башкара, – диләр аның турында хезмәттәшләре.

Азнакайда туып-үскән Илнур шулай ук күптәннән телевидениедә оператор булып эшли. Хәзер менә радионы да үз җилкәсенә алган. Тапшыруларның сыйфаты аңа бәйле.

– Радиотыңлаучылардан безгә җылы эчтәлектәге хатлар килә. Шалтыратып, тәкъдим-киңәшләрен әйтүчеләр шактый. Димәк, безне халык тыңлый, ярата. Районның массакүләм мәгълүмат чаралары арасында Азнакай радиосы үзенең лаеклы урынын табуга без шатбыз һәм Яңа елга яңа планнар, ак хыяллар белән керәбез, – диләр алар.

Радио "Азнакай"

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ