Азнакай муниципаль районы

Тайгак юлда таяныч кирәк

2014 елның 15 гыйнвары, чәршәмбе

Һава торышын аңлармын димә. Әле җебетә, әле туңдыра, я булмаса буранлап кар явып китә. Ял көне нәкъ яздагыча җебетеп җибәрде, йорт түбәләренә яткан кар, боз сөңгеләре ишелеп-ишелеп, шуып төште.

– Хәзер урамга чыгарга да дер калтырап торам, – ди Рәсимә ханым. – Ленин урамы, 40 йортта урнашкан кибеткә кереп барышым иде. Күз алдымда түбәдән бер өем бозлы кар ишелеп төште. Мине санаулы сантиметрлар гына коткарып калды. “Бәхетең бар икән, исән калмас идең”, – диде узып баручы бер апа.

– Подъезд баскычыннан төшкәндә бала белән егылдым. Ярый әле, алай каты бәрелмәдек. Биредә көне-төне җыештырып, карын көрәп, бозын ватып торалар. Шулкадәрле авыр эшен эшләгәч, нигә подъезд баскычларына ком да сибеп китмиләр икән? – ди яшь ана Ләйсән.

Дүшәмбе көнне иртә белән шәһәр урамнары, подъезд, объектларның баскыч төпләрен карап, фотога төшереп йөрдем. Йорт яннарыннан хәвефсез генә үтеп йөрү бик авыр. Якшәмбе көнне түбәдән тамган тамчы, салкынайткач, “шугалакка” әйләнгән. Подъезд, кибет, башка объектлар аллары кардан чистартылган булса да, боз каткан. Ләйсән ханым әйткәндәй, комын гына сибеп китсәләр икән! Ленин урамы, 21 йорт подъезд баскычларында да боз. Хәсәнов урамындагы 2 нче йортның бозлы тимер баскычларына карап: “Монда таеп егылсаң”, дип шомланып куйдым. Узып баручы Әминә апа белән фикерләремне уртаклашмакчы булам:

– Җыештыручыбыз бик әйбәт безнең, – ди ул. – Шушы кадәр җебеткәннән соң ничек шулкадәр бозны чабып бетерсен инде ул. Үзебезгә бик сак йөрергә кирәк!

Шәйхетдинов урамы, 5 йортта яшәүче Әлфинур ханым, Хәсәнов урамы, 11 йорттан Әнисә апа да сораштыра башлауга җыештыручыларны мактарга керештеләр.

– Авыр ломнар тотып, боз ватып йөрүче кызларны күреп, жәллим мин. Кыш уртасында яңгыр ява, әле генәҗылы, ә икенче көнгә кинәт суытып, я булмаса ишеп кар явып китә. Элекке чорда мондый ук хәлләр булмый иде. Кешеләрнең мәрхәмәтсезлегенә Ходайның бер җәзасыдыр бу. Шөкер, соңгы елларда иманыбызга кайтабыз, мәчетләр калка, дин юлына бастык, – дип табигать “шаяруларына” үзенчә бәя биреп алды Әнисә апа.

Ком сибү мәсьәләсе җыештыручының игътибарлы булуы, тырышлыгыннан тора икән. Кайбер ишек алды, тротуарларда (мәсәлән, Хәсәнов урамы, 18, 22 йортлар) ком сибелгән иде. – Кышкы чорга алдан ук хәзерлек чаралары күрелде. Җылыда торсын өчен, ишек алларындагы торба өстенә тротуарларга сибәр өчен ком куелды.Йорт түбәләрен даими чистарталар. Кинәт җылытып җибәргәч, 365 йортның түбәсен берьюлы көрәп бетерү мөмкин түгел. Кимчелекләрне әйтүегез өчен рәхмәт, мөмкин булганның барысын да эшләргә тырышырбыз, – диде торак-коммуналь хуҗалыгы һәм төзекләндерү Департаменты директоры Руслан Мөгътәсимов.

Әлбәттә, бөтен объектларны ишек алларын да тикшереп чыгып булмый. Халык аеруча күп йөри торган поликлиника, сырхауханәләр, социаль-көнкүреш объектлары тротуарлары, баскычлары чистартылган иде.

Иминлегебез һәм сәламәтлегебез күп очракта үзебезгә дә бәйле. Аяк киемнәре таймасын өчен наждак кәгазе, пластырь ябыштырырга була. Балаларны күзәтү астында тотарга кирәк. Бала-чага тайгак юлда сак булырга кирәк дип уйламый шул, киресенчә шуып уйнарга ярата. Кайчагында кешеләрнең битарафлыгына шаклар катасың. ТСЖ хезмәткәрләре йорт кырыйларында йөрергә ярамаганлыкны белгертеп махсус тасмалар бәйләгәннәр. Ә кайбер мәнсезләре шунда ук аларны өзгәләп тә чыкканнар. Иртә белән ялтырап торган бозда шуып йөрмәле иде, төшкә инде кайбер йортларның подъезд баскычларына (Ленин урамы, 21 йорт) ком сибеп куйганнар. Теләк булса, эшлибез икән бит. Ярый да югарыдагы очракларда “ходай саклап калды”. Ә сакламаган булса? Бозлы подъезд баскычларына комны тљш җиткәндә түгел, кешеләр эшкә, балалар бакчага барганчы сибеп куярга кирәктер ул. Карын соңыннан да көрәргә була, иң беренче чиратта кеше сәламәтлеге, иминлеге турында кайгыртырга кирәк.

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ