Азнакай муниципаль районы

Алга тагын да зуррак планнар куеп эшләргә

2014 елның 15 гыйнвары, чәршәмбе

Район һәм шәһәр эшчәнлегенә багышланган традицион атналык киңәшмәне Азнакай муниципаль район башлыгы Марсель Шәйдуллин юбилярларны бүләкләүдән һәм узган елда булган вакыйгаларны, эш-чараларны анализлаудан башлады.

– 2013 ел безнең өчен, Азнакай халкы өчен уңышлы булды дияргә мөмкин. Нинди генә өлкәне алсаң да, авыл хуҗалыгы, мәдәният, икътисад, төзелеш, спортмы барысында да үсеш күзәтелә. Үсеш булгач, нәтиҗәсе дә бар. Без алга тагын да зуррак планнар куеп, аңа омтылырга, бердәм эшләргә тиеш. Агымдагы елда һәр тармакта үсеш 5-7 проценттан да ким булмаска тиеш, шуның өчен бүгеннән җиң сызганып эшкә тотынырга кирәк, – ди район башлыгы.

Район җирлегендә оператив хәлнең торышы белән киңәшмәдә катнашучыларны Россия Эчке эшләр министрлыгының Азнакай районы буенча бүлек начальнигы Илдар Шакиров таныштырды. Аның чыгышыннан күренгәнчә, Яңа ел яллары районда тыныч узган. Ике җинаять теркәлгән, аның берсе ачылган. Шушы көннәрдә шәһәр территориясендә урнашкан кафедан эчке эшләр бүлеге хезмәткәрләре 20 уен автоматы тартып алган.

Район башлыгы шәһәр территориясендә әледән-әле уен салоннары ачылуга үзенең канәгатьсезлеген белдереп, комарлы уен бизнесы җирлегебездә булырга тиеш түгел дип искәртте һәм хокук саклау органнары вәкилләрен тагын да нәтиҗәлерәк эшләргә чакырды.

– Бина хуҗалары, арендалаучылар белән дә каты сөйләшүләр алып барырга кирәк, – ди ул.

Армиягә көзге чакырылыш нәтиҗәләре белән хәрби комиссар Рәдиф Камалеев таныштырды. План буенча, узган көз Азнакайдан 93 егет хәрби хезмәткә җибәрелергә тиеш булса да, аларның бары тик 84е генә солдат каешы таккан. Моның берничә сәбәбе дә бар. Мәсәлән, армиягә чакырылган 5 кеше Казаннан кире кайтарылган: аларның наркотик куллануы ачыкланган. Бүгенге көндә әлеге мәсьәлә буенча эчке эшләр бүлеге шөгыльләнә. Өч егет чакыру алган килеш тә качып калган, аларга карата җинаять эше кузгатылачак. Район башлыгы чакырылыш комиссиясе вәкилләрен яшьләр арасында аңлату эшләре алып барырга чакырды.

Киңәшмәнең йомгаклау өлешендә юллар чисталыгы, төзелеш эшләре алып бару, халык белән очрашулар үткәрү кебек мәсьәләләр дә күтәрелде һәм агымдагы атнага бурычлар билгеләнде, җитәкчеләр адресына тиешле күрсәтмәләр бирелде.

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ