Азнакай муниципаль районы

Мәдәният елына аяк бастык

2014 елның 16 гыйнвары, пәнҗешәмбе

Кеше маймылдан нәрсәсе белән аерыла? Әлбәттә, фәлсәфи фикерләү яки бөек ачышлар ясау сәләте белән генә түгел. Башка тереклектән үзгә буларак, адәм баласына матди генә түгел, рухи байлыкка да омтылыш бирелгән. 2014 ел республикабызда Мәдәният елы дип игълан ителде. Азнакайлылар аңа нинди өметләр баглый?

Гөлсинә ХАФИЗОВА, мәдәният идарәсе начальнигы:

– Азнакай – ул әдәбият-сәнгать дөньясына бик күп танылган шәхесләр биргән як. Мәдәни кыйблабыз да – халыкка хезмәт итү, яңадан-яңа талантлар ачу. Өч ел рәттән районыбызда Чатыр тау җыены үткәрелде. Быел ул төбәкара дәрәҗәдә оештырылачак. 25 мартта Мәдәният хезмәткәрләре көнен зурлап билгеләп үтәргә җыенабыз. Безнең мәдәният хезмәткәрләре һәр бәйрәмнең үзәгендә. Күпсанлы грантларыбыз, республика ил, халыкара бәйгеләрдә җиңүләребез бу өлкәдә үз эшләренең чын осталары эшләве хакында сөйли. Быел республика программасы буенча Мәндәй авылында клуб салыначак, район хисабыннан авылларда мәдәният йортларын капиталь ремонтлау дәвам итәчәк.

Лилия МОРТАЗИНА, үзәкләштерелгән китапханәләрсистемасы директоры:

– Мәдәният өлкәсендә эшләүчеләрнең хезмәт хаклары артсын, китапханәләрдә җиһазлар яңартылсын иде, грантлар яуларга язсын дигән теләктә калабыз. Китап укучыларны күбрәк җәлеп итү максатыннан китапханәләрдә быел күптөрле чаралар үткрәрергә планлаштырдык.

Илдус ГЫЙЛӘҖЕВ, шагыйрь:

– Быел Татарстан китап нәшриятында шәхсән үземнең “Назга сусау” дигән җыентыгым чыгарга тиеш. Райондашлар өчен генә түгел, башка төбәкләрдә яшәүчеләр өчен дә тиздән дөнья күрәчәк Азнакай энциклопедиясе бик кызыклы булыр дип уйлыйбыз. Шулай ук Әфган һәм Чечен сугышларында катнашкан якташларыбыз турында да китап басылачак

Мәдәният елында иҗат кешеләренә игътибар артсын, аларга сак караш булсын, Азнакай татарлык йөзен югалтмасын иде дигән теләктә калам.

Ирина ХАЛИКОВА, туган якны өйрәнү музее директоры:

– Азнакайның тарихы чал гасыр төпкеленә барып тоташа. Әле дә авылларда “әби патша” күперләре саклана, Чатыр тау Пугачев яугирләрен үз куенына сыендырган, Сәпәй янында “Хрущев” урманы шаулап утыра... Районыбыздан күпме сугыш һәм хезмәт геройлары калкып чыккан! Әдәбият-сәнгать йолдызларын санап та бетерерлек түгел! Бу кадәр мәгълүматны сакларга бүгенге музей гына тар. Узган ел без яңа музей комплексы төзелеше проекты буенча грант оттык. Шәһәребез үзәгендә быел аңа нигез салына башлаячак. Ул берничә бура-йорттан торачак. Аларда районыбызның үткәне дә, бүгенгесе дә чагылачак, шулай ук гаилә белән ял итү урыннары да каралган. Музей комплексы төзелеп беткәч, районыбыз күрке һәм горурлыгы, азнакайлыларның һәм кунакларның яраткан ял урыны булыр дип ышанабыз.

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ