Азнакай муниципаль районы

Тымытыкта театр яраталар

2014 елның 21 гыйнвары, сишәмбе

Мәдәният йортының тамаша залында, кем әйтмешли, алма төшәрлек тә урын юк. Шулай булмый ни, сәхнәдә үзебезнең артистлар ич. 20нче сезонын театрыбыз Ф.Садриевның “Җәмиләнең җенләнүе” комедиясе белән башлап җибәрде.

Халык театры исеме коллективка 2004 елның 20 февралендә бирелде. Гәрчә, үзешчәннәребез сәхнәдә инде шактыйдан. Без бәләкәй чакларда әти-әниләрнең сөйләгәннәре истә. Сугыш чоры, аннан соңгы авыр елларда ятимнәрнең, ач-ялангачларның күңелләрен юатып элеккеге агач клубта Миңневафа Кәрамова, Шакирә Ихсанова, Бөек Ватан сугышы ветераннары Ясир Закиров, Хәй Гәрәев (алар инде мәрхүмнәр), атаклы гармунчы Рәфәгать Хикмәтуллин (мәктәп, балалар бакчасында, клубта эшләгән ветеранны олы хөрмәт итеп яшибез) халыкка хезмәт иткәннәр.

– 16 яшемдә спектакльдә уйный башлап, гомерем буена сәхнәдә яшәдем, – дип искә ала Сәкинә апа Исхакова. – “Миңлекамал”, “Шәмсекамар”, “Изге амәнәт”, “Кайту” кебек спектакльләрдә төп рольләрне башкарырга туры килде.

Азнакай халык театрының мәшһүр артистлары мәрхүм Шагали Усманов, аның тормыш иптәше Нәсимә апа да иҗатка тәүге адымнарын Тымытыкта башлап җибәргән.

Шул чорлардан соң шактый туктап торган театр эшчәнлегенә 1991 елда мәдәният йорты директоры итеп билгеләнгән Раушания Идрисова кабаттан җан өрә. Г.Камалның “Беренче театр”ы белән җанланып киткән коллектив елдан-ел яңа уңышлар яулый. Ф.Садриевның “Тозлы бал”, Т.Миңнуллинның “Әниләр һәм бәбиләр” спектакльләре кат-кат куела, кыска гына вакыт эчендә үзешчәннәр халык мәхәббәтен яулый. Х.Вахитның “Мәхәббәтең чын булса”, К.Тинчуринның “Зәңгәр шәл”е азнакайлыларны әсир итә. Район Мәдәният йорты хезмәткәрләре, җитәкчеләре мәрхүм Маис Вәлиев, Гата Ялалов, Азат Галимов, Зөлхия Миңнеханова тымытыклыларга киңәш-фикерләрен җиткереп, иҗатка дәрт өстәп торалар.

Үзешчәннәрнең “Әлдермештән Әлмәндәр” спектакленә башкаладан автор үзе – Туфан Миңнуллин килде. Иҗатыбызга югары бәя биреп, артистларга гримм һәм сакаллар бүләк итте. Ә.Еникийның театрыбыз сәхнәләштергән “Әйтелмәгән васыять» әсәрен дә халык бик җылы кабул итте. Район җитәкчелеге тарафыннан 50 000 сумлык сертификатка да ия булдык.

“Җәмиләнең җенләнүе”ндә авторга хас гадилек, тормышның ничек бар – шулай чагылышы. Ул халыкны рәхәтләнеп көлдерде дә, кайнана-киленнәргә гыйбрәт тә булды. Җәмилә киленне уйнаган Л.Идрисова, “кайнанасы” Ф.Исламова, “гайбәтче Гыйльмениса карчык” Г.Гыйздәтуллина әйтерсең лә Бермут өчпочмагында.Кайнана киленнән, килен кайнанадан зарланып, гайбәтче Гыйльменисага моң-зарларын сөйлиләр. Карчык боларның барсын бутап, күршеләре Хәсби карт (И.Әхмәтшин) һәм Шәмсия карчыкка (Ф.Мөхәммәтова) җиткерә. Нәтиҗәдә Җәмилә ире Сабит (Т.Мәһдиев) белән аерылышуга ук барып җитә. Вакыйгада катнашучыларның барсы да тормыш сабагы ала. Шулкадәр оста музыкаль бизәлешле, артистлары “янып торган” тамаша бер сулышта каралды. Тамашачыларның көчле алкышлары да әнә шуны дәлилли иде.

– Камал артистларыннан бер дә ким уйнамадыгыз, авылыбызның йөзек кашы булган халык театрының данын шулай киләчәктә дә югалтмагыз, без сезнең белән горурланабыз, – диде барчасы исеменнән җиткерелгән рәхмәт сүзендә авылның ветераннар советы рәисе Радик Солтанов.

Киләсе елда коллектив халык театры исеме бирелүнең ун еллыгын билгеләп үтәчәк. Авылның гына түгел, районкүләм истәлекле вакыйгага әзерлек инде башланды.

Лилия Идрисова

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ