Азнакай муниципаль районы

Фермерлар авылы

2014 елның 22 гыйнвары, чәршәмбе

Әлкәй – Азнакай муниципаль районында авыл хуҗалыгының барлык төр җитештерү тармаклары да фермерлар карамагына күчкән бердәнбер авыл җирлеге. Узган атна азагында анда җирлекнең еллык хисап җыелышы булды.

Биредә бүген бертуган Ленар һәм Вилдан Сәлаховлар, Мөдәрис Кәлимуллин, Рамил Хәбибуллин, Фәнис Закиров, Марина Котлыкаева, Илмир Харисов һәм Рамил Исламов җитәкчелегендәге 6 крестьян-фермер хуҗалыгы нәтиҗәле генә эш алып бара.

– Фермер егетләребез халыктан арендага алган пай җирләрен агротехник чаралар нигезендә җиренә җиткереп эшкәртәләр, иген игәләр, – дип билгеләп үтте үзенең хисап чыгышында Әлкәй авыл җирлеге башлыгы Радик Адлер. – Халыкка вәгъдә ителгән печән, салам, фуражны үз вакытында һәм тулысынча өләшәләр.

Ленар Сәлахов белән Рамил Хәбибуллин, җир эшкәртү, игенчелек белән шөгыльләнү өстенә, терлекчелекне үстерүдә дә зур эш алып баралар икән. Беренчесе үзенең фермер хуҗалыгында 100 баш мөгезле эре терлек асрый. Шуларның 60 ы – савым сыер. Болар өстенә 20 аты да бар. Икенчесендәге 51 баш малның 43 е – сыер. Алар республиканың гаилә фермалары арасындагы грантын отканнар һәм шул хисапка терлекчелек торакларын төзекләндергәннәр.

Җирлек башлыгы әйтүенчә, биредәге фермерлык хәрәкәте бүген кешене эшле, шуның белән авылның икътисади яшәешен тәэмин итә. Узган елның декабрь азакларында республикада шәхси һәм фермер хуҗалыкларын үстерүгә багышланган, эшендә Татарстан Дәүләт Советы рәисе Фәрит Мөхәммәтшин, Республика Премьер-министры урынбасары, Авыл хуҗалыгы министры Марат Әхмәтов, 16 районнан килгән вәкилләр катнашкан зона семинар-киңәшмәсенең биредә уздырылуы да юктан гына түгелдер...

Әлкәй һәм Кызыл Сукачы (Чатра) авылларын берләштергән җирлектәге 270 хуҗалыкта бүген 522 кеше яши. Аларның 175 е – пенсионерлар һәм инвалидлар.

Әлкәйдә мәктәп (анда 48 укучы белем ала), балалар бакчасы (8 сабый йөри), мәчет, ФАП, мәдәният йорты, китапханә, почта, 1 шәхси һәм 1 райпо кибете эшли, җирлек Советы бинасындагы бүлмәдә полициянең участок инспекторы халыкны кабул итә.

–Авыл халкы нигездә ташламалар, субсидияләр, мирас, пай җирләрен рәсмиләштерү, электр, элемтә, газ өчен ташламаларны хисаплау, пенсия билгеләү, төзелеш эшләре һәм үзләрен борчыган башка күп кенә мәсьәләләр буенча мөрәҗәгать итә. Һәр кеше белән аерым эшлибез, үтенеч-тәкъдимнәрен вакытында үтәргә тырышабыз, – ди җирлек башлыгы.

Балалар бакчасы тәрбиячесе Нәзирә Сәлахова, ФАП мөдире Светлана Зиннурова, мәдәният йорты директоры Илзирә Мусина да еллык эшчәнлекләренә халык алдында хисап тотты, хәл итәсе проблемаларын җиткерде.

Азнакай муниципаль районының 2013 елдагы социаль-икътисади эшчәнлеге белән җыелышта катнашучыларны район Советы аппараты җитәкчесе Айдар Хәлиуллин таныштырды, халыктан кергән күп кенә сорауларга җавап бирде. Шуларның берсе – медпункт бинасында авыруларны кабул итү өчен тиешле шартларның җитешмәве, өстәвенә, су линиясе үткәрелмәгәнлеге турында иде. Район Советы аппараты җитәкчесе шул ук көнне ФАП бинасында булды, хәлнең торышы белән кызыксынды.

Наил Абдуллин

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ