Азнакай муниципаль районы

35 йортка капиталь ремонт ясалачак

2014 елның 22 гыйнвары, чәршәмбе

Район һәм шәһәр эшчәнлегенә багышланган традицион атналык киңәшмәне Азнакай муниципаль район башлыгы урынбасары Наҗәт Нәгыймов юбилярларны бүләкләүдән һәм узган атнада булган вакыйгаларны, эш-чараларны анализлаудан башлады.

Район җирлегендә оператив хәлнең торышы белән киңәшмәдә катнашучыларны Россия Эчке эшләр министрлыгының Азнакай районы буенча бүлеге начальнигы урынбасары Рафаэль Әюпов таныштырды. Узган атнада җирлегебездә 8 җинаять кылынган, аларның җидесе “кайнар эз”дән ачылган. Һава торышы тотрыклы булмау сәбәпле, юл-транспорт вакыйгалары саны арткан – 37 очрак теркәлгән, бәхеткә, каза күрүчеләр юк. Ул районда 25 гыйнварга кадәр “Легаль булмаган мигрант” максатчан оператив-профилактика чарасы баруын белдерде. Акция кысаларында хокук саклау органнары вәкилләре, федераль миграция хезмәтчелеге хезмәткәрләре белән берлектә, чит ил гражданнарының Россия территориясендә законсыз яшәү очракларын кисәтү, тикшерү өстендә эшлиләр.

Азнакайда бүген 5 ТСЖ һәм 3 идарә итү компаниясе карамагында 354 күпфатирлы йорт исәпләнә. Узган ел 26 йортка капиталь ремонт ясалган булса, агымдагы елда тагын 35 күпфатирлы йорт ремонтланачак. Торак-коммуналь хуҗалыгы һәм төзекләндерү Департаменты җитәкчесе Руслан Мөгътәсимов сүзләренә караганда, агымдагы елның гыйнвар аена азнакайлыларның торак-коммуналь хезмәтләр өчен әҗәтләре 56 миллионнан артып киткән. Әлеге мәсьәләне Наҗәт Нәгыймов каты контрольгә алып, бурычы булган һәркем белән аерым сөйләшүләр алып барырга кушты.

– Кемнәрнеңдер түләмәгән бурычлары башкаларның җилкәсенә ятарга тиеш түгел, – ди район башлыгы урынбасары.

Киңәшмәнең йомгаклау өлешендә юллар чисталыгы, төзелеш эшләре алып бару, халык белән очрашулар оештыру кебек мәсьәләләр дә күтәрелде һәм агымдагы атнага бурычлар билгеләнде, җитәкчеләр адресына тиешле күрсәтмәләр бирелде.

"Азнакай" радиосын тыңларга >>>

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ