Азнакай муниципаль районы

Күчәргәме, күчмәскәме?

2014 елның 23 гыйнвары, пәнҗешәмбе

Соңгы вакытта сәгать тирәсендә, ягъни мәсәлән, аны җәйге вакыттагыча тотумы, кышкысына күчү яхшыракмы булуы турында бәхәсләр куерганнан куера. Мәгълүм булганча, бу күчешне Олимпиада белән дә бәйлиләр. Ягъни Европа илләре белән Россия арасындагы өч сәгатьлек вакыт аермасы чит ил тамашачысына уеннарны күзәтеп барырга комачау итәчәк икән. Ә менә азнакайлылар кышкы вакытка күчүгә ничек карый? Шул хакта фикерләр белән кызыксынып шәһәрдәшләребезгә мөрәҗәгать иттек.

Ниһат Мозаффаров, нефть тармагы ветераны:

–Вакытны табигый халәтенә кайтарырга кирәк. Безнең организм белән кояш идарә итә, ә ул – иң төгәл биологик вакытны билгеләүче җисем. Хәзер бу вакыт күпкә соңрак йөри. Моны өлкәннәр намаз вакытларының үзгәрешеннән дә сизә.

Әлфия,16 яшь, мәктәп укучысы:

–Иртән мәктәпкә барганда караңгы булса да, кич түгәрәкләргә, спорт секциясенә, консультацияләргә йөрергә рәхәт, чөнки кайтканда дөм караңгы булмый. Минем үземә хәзерге вакыт бик ошый.

Ихсан Шәрифуллин, 82 яшь:

–Без инде карчыгым белән олы яшьтәге кешеләр, кичлегебез бик юк. Сигез тулуга йокларга ятабыз, мал-туар карыйсы булмаса да иртән дүрттә, биштә үк торабыз, чөнки йокы инде туйган була. Безгә сәгать теле алышынса ни дә, алышынмаса ни...

Фәния, өч бала анасы:

–Бакчага йөрүче кечкенә улыбызны иртән уятуы яман. Һич торасы килми. Моңа тышта әле бик караңгы булу да тәэсир итә торгандыр. Без бакчага барганда да яктырмый әле. Кайтарсыннар сәгатьне элеккеге вакытка, сабыйлар йокыларын йоклар ичмасам. Иртәнге якта ул бигрәк тә тәмле бит.

Марат:

–Минемчә, төгәл бер фасыл вакытында гына калырга кирәк. Ярый да Казанда, Мәскәүдә яшәүчеләр сәгать 9 га гына эшкә йөри. Авыл җирендә кышкы айларда иртән дөм караңгы, көтүе белән йөргән этләрне дә уйласаң... Мин үзем кышкы вакытка күчү ягында.

Без бу сорауны район үзәк сырхауханәсе табибларына да юлладык. Аларның төп фикере шуннан гыйбарәт: вакыт үзгәртүнең кеше организмына тәэсирен максатчан медицина тикшерүе үткәреп, фәнни өйрәнүләр алып барып кына әйтеп була. Берәүләр бу күчешнең үзенә начар йогынтысын сизсә, икенчеләре уңай кабул итәргә мөмкин. Һәр кешенең организмы үзенә генә хас үзенчәлекләргә ия.

Сораштырды: Лиза Нурлыева

ОАО "Татмедиа" филиалы "МАЯК" редакциясе http://aznakaevo-rt.ru/ru.html

БАРЛЫК ЯҢАЛЫКЛАРНЫ УКУ