Батыр истәлегенә ярыш
Мәктәбебездә булган матур традицияләргә тагын берәү өстәлде.Өченче ел рәттән районыбызның авыл укучылары өчен Мөдәрис Сәхбиев истәлегенә багышланган волейбол ярышлары үткәрелде.Быел ул Әфганстанда интернациональ бурычын үтәгәндә һәлак булган егетнең туган көненә - дүртенче декабрьгә туры китереп оештырылды.
Чараны ачу тантанасында хәрби хәрәкәтләр ветераннарының Азнакай район иҗтимагый оешмасы рәисе Исламов Илшат Әхәт улы, военком Камалиев Рәдиф Әнәс улы катнашты.Мөдәриснең сеңлесе - Гөлназ абыйсының спорт яратуы, батыр булуы турында сөйләде, егетләргә уңышлар теләде.
Уенда кызыклы һәм дулкынландыргыч мизгелләр күп булды, һәр команда матур уен күрсәтте. Дүртенче урынны Чубар Абдул егетләре, өченчене - Җиңү бистәсе командасы яулады, Сарлы мәктәбенең җыелма командасы – икенче урында.Ә күчмә кубок исә өченче тапкыр Кәкре Елга авылында кала. Әлеге команданы әзерләүче - барыбыз да яраткан физкультура укытучыбыз Сафин Ринат Хуҗа улы - ярышка йомгак ясаганда, алдагы елларда да егетләрне көтеп калуын әйтте.
Минемчә, мондый ярышлар укучыларны берләштерә, дуслаштыра, батырларның исемнәрен онытылмаслык итеп хәтерләргә яза.
Баһауов Ильяс, 10 нчы сыйныф укучысы