Гаиләне ничек сакларга?
Бүген Татарстанда барлыгы 300 пар язылышачак. Республикада яшәүче 70 үрнәк гаиләгә исә “Мәхәббәт һәм тугрылык өчен” медале тапшырырга ниятлиләр. Татарстанда гына түгел, ил күләмендә иң “яшь” бәйрәмнәрнең берсе – Гаилә, мәхәббәт һәм тугрылык көне республикада әнә шундый вакыйгалар белән истә калыр дип көтелә. Алай гына да түгел, бүген “Казан” гаилә үзәге янында башланган гаилә бәйрәме якшәмбегә кадәр дәвам итәчәк әле. Кыскасы, бу көннәрдә гаиләләргә игътибар артачак.
Бүгенге бәйрәм гаиләләрнең ныклыгын, бер-береңә ихтирам һәм хөрмәт хисен арттырачак, дип ышандыра оештыручылар. Республика күләмендә нинди генә чаралар юк! Балтачта, мәсәлән, “Балалар коляскалары парады” узачак. Мамадышта яшәүчеләргә бәйрәм символы – ромашка чәчәге өләшергә ниятлиләр. Ә Түбән Камада әниләр урам тотачак. Чаллыда спорт яраткан гаиләләр велосипед иярләячәк. Гадәттәгечә, республиканың төрле районнарында яшәүче үрнәк гаиләләргә бәйрәм бүләге – медаль дә тапшыралар. Бүләкләнүчеләр арасында авыл хезмәтчәннәре, сәнәгатьнең төрле тармакларында хезмәт итүчеләр, укытучылар, табиблар, мәдәният эшлеклеләре дә бар. Әйтик, Нурлат районыннан Федоровлар гаиләсе тугыз бала тәрбияләп үстергән, моңа өстәп тагын алты ятимне сыендырган. Әлмәт районыннан ветеран Васыйл Хуҗәхмәтов гаиләсе быел бриллиант юбилеен бәйрәм итә. Казаннан Шәфиевләр гаиләсе – чын спорт династиясе. Аларның 9 яшьлек оныклары да – нәфис гимнастика буенча Россия һәм халыкара ярышлар җиңүчесе. Алабуга районыннан Нуриевлар гаиләсе 10 бала тәрбияләп үстергән. Бүген алар – 22 онык һәм 14 оныкчыкның кадерле дәү әнисе һәм дәү әтисе.
Бәйрәмгә бәйле иң зур чаралар Казанда көтелә. Бүген башланган бәйрәм якшәмбегә кадәр дәвам итәчәк хәтта. “Казан” гаилә үзәге янәшәсендәге яшел чирәмдә республикадагы барлык гаиләләрне дә көтеп калалар. Бүгенге чаралар дискотека белән тәмамланса, иртәгә көн дәвамында спорт ярышларында катнашырга, ә кич ачык һавада кино карарга мөмкин. Якшәмбе көнне бәйрәм мәйданына килүчеләрне концерт-тамаша да көтә. Гаилә, мәхәббәт һәм тугрылык көне кияү һәм кәләшләр арасында гына әллә ни зур кызыксыну уятмаган. “Быел бәйрәм җомгага туры килде. Җәй айларында җомга, шимбә көннәрендә туйлар бик күп теркәлә. Бүген, мәсәлән, республика күләмендә 300 пар язылышачак. Тик бу – җәй айлары өчен гадәти күренеш”, – диде Альбина Шәвәлиева. Шунысы да бар: бүген язылышу тантанасында ЗАГС бүлекчәләре белгечләре белән беррәттән, психологлар да эшләячәк.
Әле күптән түгел генә Казан мэриясендә узган очрашуларның берсендә шәһәр мэры Илсур Метшин Гаилә, мәхәббәт һәм тугрылык көне турында сөйләгәндә: “Татарстанда әлеге “яшь” бәйрәмне билгеләп узу күркәм традициягә әйләнсен өчен күпмедер вакыт кирәк, һичшиксез, бу көн иң яраткан һәм кадерләп көтеп алган бәйрәм булырга лаек”, – дип белдергән иде. Мәгълүм булганча, Гаилә, мәхәббәт һәм тугрылык көне тугызынчы ел билгеләп узыла. Бу хакта сөйләшү атна уртасында Хөкүмәт йортында узган брифингта да дәвам итте. Гаилә турында сүз чыккач, Татарстан Министрлар Кабинетының ЗАГС идарәсе җитәкчесе Альбина Шәвәлиева аерылышуга бәйле мәсьәләне дә читләтеп узмады.
Быелның беренче яртысына алынган мәгълүматларга караганда, республикада аерылышучылар саны җиде процентка арткан. Бәйрәм көнне кәефне иң күп кырган яңалык, мөгаен, әнә шулдыр. Ни өчен күбрәк аерылыша башлаганнар дигән сорауга да җавап бар. Моңа күпмедер дәрәҗәдә үзебез үк гаепле! “Быелның беренче яртысында Татарстанда аерылышу турында 6 мең 710 акт теркәлгән. 1 июльдән башлап ЗАГСка кире әйләнеп кайтучы парлар арасында сораштыру да үткәрә башадык. Тикшерүнең инде нәтиҗәләре дә бар. Баксаң, аерылышу турында карар кабул итүчеләрнең күбесе инде шактый вакыттан бирле аерым тормыш итүчеләр икән. Бергә яшәмәсәләр дә, моңарчы бу хакта рәсми документлары булмаган. Хәзер исә ЗАГСка килгәннәр. Чөнки тиздән аерылышу тәртибе катлауланырга мөмкин. Яңалык гамәлгә кергәнче, өлгереп калмакчылар”, – дип сөйләде Альбина Шәвәлиева.
Инде хәбәр иткәнебезчә, республика башлыгы Рөстәм Миңнеханов тәкъдиме белән Татарстан Дәүләт Советы депутатлары РФ Гаилә кодексына үзгәрешләр әзерләде. Аның нигезендә аерылышуны катлауландырмакчылар.
Мәсәлән, хәзер гаиләне таркатырга теләүчеләргә уйларга бер ай вакыт бирелсә, алга таба аны өч айга кадәр озайтмакчылар. Гаиләдә кечкенә бала булган очракта, әлеге вакыт ярты елга кадәр җитәргә дә мөмкин. Шул рәвешле депутатлар гаиләләрне саклап калмакчы. Альбина Шәвәлиева әйтүенчә, бүген РФ Гаилә кодексына үзгәрешләр кертүгә бәйле уңай якка үзгәрешләр турында сөйләргә иртәрәк әле. Яңалык Россия Дәүләт Думасында яклау тапкан очракта, тагын берничә ел көтәргә кирәк булачак, дип фаразлады ЗАГС җитәкчесе.
Эльвира Вәлиева
(“Ватаным Татарстан”, /№ 96, 08.07.2016/)