Республиканың иң яхшы савучысы – Азнакайдан!
Тукай районында машина белән саву операторларының республика конкурсы узды.
Әлеге ярышның абсолют җиңүчесе «Азнакай " агрофирмасының Татшуган бүлекчәсеннән Резеда Газыева булды.
Резеданың терлекчелектә 19 еллык эш стажы бар.
- Инде биш ел район сыер савучылар конкурсында җиңүче булып торам, 2019 елда республика буенча икенче урынны алды. Бүген югарырак баскычка күтәрелергә мөмкин булды. Без теоретик мәсьәләләр буенча, саву аппаратын сүтү һәм җыю һәм сыер саву буенча ярыштык, - ди ул.
Быел республика савымчылар конкурсы илленче тапкыр үткәрелә.
- Безнең районның алдынгы сөт савучылары ел саен әлеге конкурста катнашалар, даими рәвештә призлы урыннар яулыйлар. Бу җентекләп әзерләнү нәтиҗәсе. Иң яхшыларны ачыклау, аларны конкурска әзерләү максатыннан, районда да ярышлар оештырабыз. Конкурс таләпләре бик югары, барлык нюансларны да исәпкә алырга кирәк, – ди район авыл хуҗалыгы һәм азык-төлек идарәсе башлыгы Рамил Исламов.
Азнакай